Čim sam vidija kaldaju kako se namušije i priti s mora, omar sam zna da će puno grubo sneverat. Počelo je otprilike u tri manje kvarat. Zapuvala nika divja lebićada, cipadu gromi, rebumbaje ka u bronzinu, pomislija san da je ovo uranija susvita ča su ga najavili za subotu.Oli petak, kad ono? I naravski, svaki put čim malo zalampa, nama nestane letrike. Roge čačine i materine! Vazeja sam lumbrelu, spustija se priko balature u konobu da najden barenko koju šteriku, ma unutra se nije vidilo božetebe. Ka u nika doba, eto ti šinjorine Grozde i sestre jon Božanke da ča činin. Ča ja činin? A ča vi činite na ulicu po nevrimenu? A evo nan je nestalo letrike pa ne moremo gledat serije. Đava vam serije odnija, zato ste i ostale stare cure kad po cile dane serije gledate! Oćete na kafu? To san in ponudija samo onako usput da ih se liberan, a one da oće. Uspeli smo se uza skale, ušli u kužinu, jan san naložija špaker a one su se smistile na otoman ka dvi prinčipeše. Altroke otomansko carstvo. Jeste za čakod žešćega? A ča imate - pitale su uglas. Jeman domaću orahovicu i travaricu. Aj meni more jedna orahovica - rekla je Grozde. I jan ću isto - dodala je Božanka. Posli san uvidija da mi je to bila velika greška. Nisu stale govorit. Jedna črčajika druga mažinin. A vanka je kiša cipala ka iz kabla, nije mislila stat. A letrike nima. A njih dvi mliju li ga mliju. Zva san elektru da čujen kad će doć letrika. Niko se ne javije. Biće na terenu. Ubacija san još dvi žbice u špaker, a one još po jedan bićerin. Ala ča van je lipo teplo ovod - rekla je Božanka.
E teplo, teplo, bilo bi i tebi teplo da... pomislija san nešto, ali nisan ništa izgovorija.

Sva srića da je oko osan došla. Na letriku mislin e. Čin je zasvitlilo, njih dvi skočile sa otomana ka da ih je koko uboja brukvon u gujcu. Počinje Larin izbor - rekle su.
Nisan nikad mislija da ću bit toliko sritan zara toga šta počinje Larin izbor.

Đava jin serije odnija. Zanavik će ostat stare cure.

Najboje da van na samomen početku rečen, ja van se u ove stvari slabo tendin, da mi nije bilo malega Joška o suside Filke koji mi je pomoga užgat konpjuter i pokaza sve batude kako ću notat ovu stranicu, din ću upisat ime di bezime i kako ću odabrat niki da prostite pasvord, ja bin još uvik bija dekapoto nepismen. A ča ću van poć govorit, jerbo ako postoji Supermen, Betmen oli Hi.men, ko meni brani bit Nepis.men. Nemojte zamirit ali javan nisan navika govorit pravilno, još manje pisat, zadnje ča san napisa zaozbiljno bila je zadaća iz ervaskog u drugon razredu srinje skule i to san dobija minus dva. Vaja pošteno reć, nisam bija najboji učenik, više san se volija lambikat okolo nego štit libre, ma isto nikad nisam ponavja godinu. Uostalon, to nije ni po juskin ni po zakoniman prirode. Ponavjat godinu, nu! Evo, je li ovo sad dvi ijade i dvanajsta? Je! Oćemo li za petnajst dan ulist u novu dvi ijade i trinajstu? Falabogu oćemo ako nas u petak dvajstiprvoga ne strefi susvita. Ali san skroz naskroz siguran da posli prvi prvoga niko neće ponavjat dvi i dvanajstu, ni oni šta su bili odlikaši, a još manje jedinaši. Na staru godinu, na zanju sjednicu nastavničkoga vijeća svima se posušu aši i timbraju duje iako za pravo reć, tri dila njih nisu kapaci za prić prag o konduta, a najskoli od nove godine.

A sa van gren jedan čas ća, ostajte mi zdravi i veseli.